Plantun de Prouvènço

Pèr coumpara dos planto d'encò nostre

Poa molinerii & Chrozophora tinctoria

Margaioun(-de-Molinier)

Poa molinerii

Poaceae Graminaceae

Autre noum : Péu-de-chin.

Nom en français : Pâturin de Molinier.

Descripcioun :
Aquéu margaioun trachis dins li tepiero seco de mountagno ounte ié flouris l'estiéu. Fai parti dóu group di margaioun dis Aup, Poa alpina. Pòu pamens se n'en destria bonodi lou bout di fueio que soun un pau plega e subretout acaba emé d'esclerenchime larg, e de limbe de fueio basalo esfloura que se roumpon à la baso quouro ié tiras dessubre. Èi verai qu'es un pau tihous.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 5 à 20 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Poa
Famiho : Poaceae
Famiho classico : Graminaceae

Ordre : Poales

Coulour de la flour : Vióuleto
Petalo : ges
Ø (o loungour) enflourejado : 2 à 3,5 cm
Flourido : Printèms - Estiéu

Sòu : Ca (Si)
Autour basso e auto : 700 à 2600 m
Aparado : Noun
Mai à juliet

Liò : Tepiero seco
Estànci : Mountagnard à Aupen
Couroulougi : Ouroufito-Sud-Aupenco
Ref. sc. : Poa molinerii Balb., 1801 (= Poa alpina subsp. xerophila Braun-Blanq. )

Maurello

Chrozophora tinctoria

Euphorbiaceae

Noms en français : Tournesol des teinturiers, Croton des teinturiers.

Descripcioun :
La maurello es uno Euphorbiaceae que douno d'èr pulèu à l'erbo-di-toro, Heliotropium europaeum, subretout que trachis dins li champ e flouris peréu à la fin de l'estiéu. Li flour masclo e femello soun desseparado. Se recounèis à si fru en boulo, cubert de berrugo e à si péu estela (fotò).

Usanço :
Emé la planto se fasié la tenchuro de viro-soulèu que servié à l'Age-Mejan à l'enluminamen di libre e tambèn pèr acoulouri lou manja. D'efèt chanjo de coulour, passo de blu à rouge, quouro lou mitan es acide (pèr acò se boutié li boursèu dins la pisso). Acò se retrobo dins lou papié Tournesol qu'utiliso la chimìo.